|
indietro
Il sît AMMER
AMMER, Archivi Multimediâl de Memorie de Emigrazion Regjonâl, al è un archivi digjitâl che al met adun fotografiis, documents di cjarte e intervistis regjistradis dai protagoniscj de emigrazion dal Friûl - Vignesie Julie. AMMER al è stât screât tal 2006 cuntun prin grup di 100 intervistis e 5000 fotografiis, cjapadis sù in Argjentine e in Uruguay. Vie pai agns la ricercje e je stade slargjade, a man a man, a ducj i Paîs dulà che a son lâts i flus migratoris de regjon. Lis tapis sucessivis a àn rivuardât Canadà, Australie, Stâts Unîts di Americhe, Venezuela e, in Europe, France, Gjermanie, Svuizare e Belgjiche. La ricercje e va indenant in Brasîl, Sud Afriche, Europe nordorientâl e orientâl. AMMER al è stât progjetât par jessi costruît cun formis di gjestion partecipade. I emigrâts, lis lôr fameis e i lôr dissendents a son cjapâts dentri in maniere direte, tant che testimonis e fornidôrs de documentazion e tal stes timp tant che utents des informazions, insiemi cui studiôs e cun ducj i interessâts.
La ricercje, la digjitalizazion e la catalogazion dai materiâi che a formin l’AMMER, a vegnin fatis tes fameis dai Paîs forescj dulà che a stan i emigrâts.
A fasin part dal progjet AMMER ancje materiâi presints sul teritori regjonâl, li di istituzions, archivis, ents e privâts. La prime tape e je stade la digjitalizazion dal patrimoni fotografic dal Museu de Emigrazion di Cjavàs (Pn).
Ognidun al pues mandâ al AMMER la sô storie e lis fotografiis che al à, riprodusintlis in formât digjitâl e zontant lis schedis catalografichis compiladis su Internet. Si pues ancje dâ il materiâl ai catalogadôrs che a lavorin al progjet e che a van pes cjasis a cjapâlu sù cui struments necessaris e a fasin ancje la catalogazion dai ogjets, des fotografiis o dai documents.
La consultazion dal archivi e previôt i struments solits di ricercje, par nons e par tematichis (vôs Ricercjis), ma e je fate plui semplice cun acès cronologjics e gjeografics: la linie dal timp e lis mapis, che a son a man drete te prime pagjine.
Tal moment dal viaç al è dedicât un spazi di pueste, che si pues jentrâ de prime pagjine, ae vôs I viaçs.
AMMER al ufrìs ancje un struc de storie de emigrazion dal Friûl - Vignesie Julie, che une introduzion e je te prime pagjine, tal spazi La storie de emigrazion furlane. Cheste e seguìs la linie dal timp, dividude in cuatri periodis, significatîfs di diviers moments: la “grande emigrazion”, dai ultins doi decenis dal Votcent al 1914, la stasi tra lis dôs vueris mondiâls (1915-1939), la riprese dal secont daspovuere (1940-1968), la “fin” de emigrazion (dal 1969 a vuê). Par ogni Paîs rapresentât in AMMER al ven fat un aprofondiment storic. Informazions specifichis su moments e episodis particolârs si puedin cjatâ ancje sielzint i agns precîs de linie dal timp.
AMMER al è realizât de Regjon Friûl - Vignesie Julie cu la colaborazion de Universitât dal Friûl de de Universitât di Triest.
Lis struturis che a formin AMMER e che i lavorin a son il Centri regjonâl di Catalogazion e restaur dai bens culturâi (www.beniculturali.regione.fvg.it), che al è li de Vile Manin di Passarian (Udin), il Servizi identitâts linguistichis, culturâls e coregjonâi tal forest de Regjon Friûl - Vignesie Julie (www.emigrazione.regione.fvg.it), il Dipartiment Economie, Societât e Teritori de Universitât dal Friûl (http://web.uniud.it/dest/), che a son a Udin, il Dipartiment di storie e storie de art dell’Universitât di Triest, che al è a Triest (www.units.it/storia/).
|
|
 i nons cui ce cuant indulà  lis intervistis lis mapis la linie dal timp i viaçs lis storiis
|
Conte une storie di emigrazion
Scrîf culì la tô storie o chê di un parint, di un amì, di une persone che tu cognossis. Tu puedis zontâ fotografiis, altris documents, files multimediâi, leile tal AMMER e fasile cognossi insieme cun altris.
|
AIRE Anagrafe degli Italiani Residenti all'Estero
I dâts statistics dai citadins dal Friûl – Vignesie Julie residents tal forest, dividûts par Provincie, par ATO (Ambits Teritoriâl Otimâi), par comun, par continent e paîs di destinazion, a son inzornâs al mês di Jugn dal 2006.
va tal sito
|
|
web
administrator