|
indietro
Storie de emigrazion regionâl
Gian Carlo Bertuzzi
La emigrazion ise un destin, une condane par cui che al è nassût in puescj dulà che la nature e ufrìs dome miserie? La emigrazion ise une sielte coragjose di cui che al vûl “cirî fortune” e miorâ la sô situazion personâl e chê de sô famee? Fasie forsit part di un sisteme economic e sociâl che le prodûs, ma che jê stesse, dopo, e va a sostignî? La emigrazion puedie puartâ benstâ a cui che al partìs e a cui che al reste? O puartie dome degrât sociâl, culturâl, economic e demografic tai lûcs di partence? O dutis dôs lis robis insieme?
Provìn a viodilu, dal pont di viste storic, tal câs dal Friûl - Vignesie Julie.
Za te ete moderne a jerin tancj i abitants de Cjargne che a levin vie, ancje une vore lontan, par fâ i mistîrs plui diferents che si jerin specializâts, propit come che al sucedeve in altris areis alpinis. A jerin tiessidôrs, artesans, fachins, fameis e soredut cramârs. Cualchidun al è deventât marcjadant ad in grues di chescj prodots, vierzint magazens tai centris principâi des areis di vendite, metint adun, su cheste base, fortunis no di pôc, fasint sù cjasis signorîls, comprant tiere sedi in Cjargne che di altris bandis. In chescj câs si pues fevelâ di une “emigrazion dal benstâ”, par mantignî e par consolidâ un nivel di vite che in altris manieris no si varès mai otignût.
Tor la metât dal secul XIX, cuant che il svilup industriâl al cambiarà in maniere radicâl il cuadri economic european, chest sisteme al finirà. Il slargjâsi de industrializazion, de urbanizazion, de rêt dai traspuarts e domandarà simpri plui braçs pai lavôrs che a àn a ce fâ cu la edilizie e, se no cambiin lis destinazions, e cambiarà la stagjonalitât: no plui vie pal Invier, ma de Vierte ae Sierade, tai mês che a van miôr pai lavôrs di costruzion. Lis ocasions di lavôr e lis previsions di bon vivi, che al somee che i mistîrs leâts ae edilizie a garantissin, a fasin che si zui simpri di plui l’avignî individuâl e familiâr te emigrazion, simpri cun plui fuarce, cun plui impegn e cun plui int. Des areis tradizionâls, chês di mont, la emigrazion si slargje bande de planure dulà che i contadins, scjafoiâts des tassis, tignûts sot di pats colonics inicuis, ruvinâts des malatiis dai cavalîrs e des vîts, a viodin la pussibilitât di cambiâ il lôr destin dome lant viers un mont gnûf e lontan, che spes agjents di emigrazion cence scrupui e fasin viodi meraveôs. Tor la fin dal Votcent miârs di lôr a partissin pe Argjentine e pal Brasîl, invezit, sul tacâ dal secul gnûf altris miârs a laran in Americhe setentrionâl. Tal stes periodi ogni an a van tai paîs de Europe centrâl 100.000 lavoradôrs stagjonâi, dispès organizâts in grups di lavôr o fintremai in veris impresis, che in cualchi câs a deventin protagonistis dal svilup urbanistic e infrastruturâl di chei lûcs. Sul inizi dal Nûfcent la emigrazion no je plui la soluzion par saltâ fûr de miserie, ma e devente un sisteme economic che, puartant buine part de fuarce lavôr tal forest, e condizione in maniere pesante lis prospetivis di svilup interni. Propit par cheste reson la Prime Vuere Mondiâl, fermant lis ativitâts che a fasin i emigrants e interompint il flus di lavoradôrs zaromai consolidât, e distrûç chel sisteme e e anule chês che a jerin lis unichis formis di redit. Dopo de prime vuere la France, la Belgjiche e la Americhe a podaran sostituî dome in part ce che a ufrivin i paîs de Europe centrâl. La instabilitât politiche e la stasi economiche dai agns vincj e trente a sieraran ancjemò di plui lis pussibilitâts di cjatâ di ce vivi tal forest. Tancj paîs a metaran limitazions ae imigrazion, intant in Italie il regjim fassist al metarà in vore une politiche demografiche cuintri de emigrazion, ancje se dopo al varà di molâ un pôc devant dal probleme de disocupazion che e cresseve, fin a meti a disposizion dal III Reich, miârs di lavoradôrs agricui e industriâi, propit pôc prime dal conflit. In chei agns e devente plui fuarte une forme di emigrazione che prime e jere dut afat margjinâl, chê politiche, che dispès e cjape dentri personis che propit parcè che a son lavoradôrs che te emigrazion a àn vût une educazion politiche, i fasin cuintri al fassisim e propit par cheste reson a scuegnin lâ vie, come che a scuegnin fâlu tancj dai slovens e dai cravuats finîts sot dal Ream di Italie, o parcè che a vegnin perseguitâts par motîfs politics e nazionâi, o parcè che a vegnin emargjinâts dal lavôr che a fasevin tant che dipendents dal guvier asburgic.
La seconde vuere mondiâl e fâs deventâ plui grivis i problemis economics che a pesin sul Friûl za di agns e a ‘nt puarte altris che a àn a ce fâ cul esodi de Istrie e cul reinseriment problematic de economie triestine intune suaze gjeopolitiche cambiade di plante fûr. Cumò il fenomen migratori al tocje ancje Triest, cun trasferiments di là dal ocean che a tindin a deventâ definitîfs, come che al sucêt a tantis fameis che, scjampadis de Istrie jugoslave, a vegnin mandadis di organisims internazionâi di socors pes displaced persons viers la Australie e il Canadà. E torne a scomençâ ancje la emigrazion no definitive, e dispès clandestine, pai paîs europeans, cemût che al sucedeve ae fin dal ‘800, in particolâr in France, inte Belgjiche cu lis sôs minieris, tal piçul Lussemburc, dopo in Svuizare e vie pai agns cincuante in Gjermanie Federâl, che a man a man a deventaran lis metis favoridis. Il svilup economic talian di chei agns, che al pues contâ ancje sul ûs che il sisteme finanziari al fâs dai bêçs che i emigrants a mandavin aes lôr fameis in patrie, al tocje ancje il Friûl e la provincie di Triest e al torne a clamâ dongje chei che tal forest a vevin cjapât sù professionalitâts, capacitâts imprenditoriâls, risorsis di invistî. Lis dinamichis migratoriis a tindin a invertîsi e tal 1968 a son plui chei che a tornin che chei che a van vie. Cumò a son lis zonis margjinâls de regjon che a patissin, in maiere pesante, lis conseguencis de emigrazion e dal dispopolament, ma il procès di ricostruzion che al scomence dopo dai doi teremots dal 1976, al darà ancje ai abitants di chestis areis la ocasion di tornâ e inserîsi intun sisteme economic e sociâl cambiât cussì tant che, plui indenant si varà bisugne di imigrâts che a rivin di altris bandis dal mont.
fai clic per leggere tutto il saggio introduttivo di Giancarlo Bertuzzi
|
|
 i nons cui ce cuant indulà  lis intervistis lis mapis la linie dal timp i viaçs lis storiis
|
Conte une storie di emigrazion
Scrîf culì la tô storie o chê di un parint, di un amì, di une persone che tu cognossis. Tu puedis zontâ fotografiis, altris documents, files multimediâi, leile tal AMMER e fasile cognossi insieme cun altris.
|
AIRE Anagrafe degli Italiani Residenti all'Estero
I dâts statistics dai citadins dal Friûl – Vignesie Julie residents tal forest, dividûts par Provincie, par ATO (Ambits Teritoriâl Otimâi), par comun, par continent e paîs di destinazion, a son inzornâs al mês di Jugn dal 2006.
va tal sito
|
|
web
administrator