ammer - archivio multimediale della memoria dell'emigrazione regionale

indietro

La emigrazion dal Friûl Vignesie Julie in Belgjiche
Francesco Micelli

La emigrazion furlane in Belgjiche no à mai interessât i studiôs furlans di storie patrie. L’unic studi impuartant, al reste la inchieste dal 1980 puartade indevant di Guglielmo Pitzalis su lis personis tornadis tes Vals dal Nadison e lis malatiis dai polmons, in particolâr la silicosi. Nol à sens tornâ a esaminâ lis causis di un ritart cussì grant, al è invezit plui impuartant progjetâ liniis di indagjin gnovis, cirî di capî, par esempli, cemût che e vîf in dì di vuê la impuartante minorance taliane te aree di Charleroi.

Emigrazion controlade dai Stâts e emigrazion libare, integrazion sociâl e lavôr tes minieris, sintiment nazionâl e ande in pratiche cosmopolite a son – par nô - i problemis di frontâ. Lis formis di ingai, lis clausulis contratuâls, il lavôr dûr, i pericui di muart dai nestris emigrâts si ju cognòs za, almancul in maniere aprossimative. Si à di ricostruî la vite dal emigrât tal complès, e par un timp plui lunc di chel dai agns di lavôr tes minieris. Lis resons che a àn fat restâ tante int tal paîs che ju à ospitâts no son dome economichis, i flus de e pe Italie no son dal dut finîts. Une prospetive di cheste sorte e domande che si svicinisi ae materie cence vincui di apartignince regjonâl o nazionâl, ma ben in coerence cu la dibisugne di jessi tal stes timp cosmopolitis, europeans, talians e furlans par no tornâ a fâ la lapide (pûr nobile) ai muarts di Marcinelle dulâ che une provincie taliane e ricuarde i siei muarts, par lâ daûr cun interès a ducj i matrimonis miscj e capî i sintiments des ultimis gjenerazions. In sostance, cuistionaris e storiis di vite a àn di movisi tant in Belgjiche che in Italie, par scoltâ lis contis des permanencis e dai viaçs fats par tornâ, su la memorie di dopo de vuere e su lis resons des sieltis che a son stadis fatis. Une atenzion identitarie eccessive e va a pericul – come che al è sucedût – di sierâ, pluitost che di vierzi lis prospetivis, invezit la comparazion sistematiche dai grups migrants, des lôr nostalgjiis e sperancis e podarès esplicâ miôr la complessitât dai moviments migratoris.
1. Muredôrs e minadôrs: la emigrazion dopo de Prime Vuere Mondiâl
La fin de Prime Vuere Mondiâl e vierç une gnove fase migratorie pe Belgjiche. La ricostruzion dal paîs e à bisugne di tante lavoranzie. I sorevivûts de vuere, ben organizâts in sindicâts (soredut in Valonie), no acetin i lavôrs plui pericolôs, pesants o mâl paiâts e tes minieris di cjarbon sot tiere, tai cantîrs edîi e tes gjavis di piere e di marmul, par esempli, al è dificil cjatâ lavoranzie dal puest. Alore, lis autoritâts de Belgjiche a ingain in maniere sistematiche operaris forescj. I talians, in particolâr chei che a vegnin des regjons setentrionâls, a rispuindin cun buine volontât. Vie pai prins agns Vincj a rivin in Belgjiche cirche 20.000 talians: la comunitât, che tal 1910 no rivave a 4.500 personis, tal Avost dal 1924 e rive a 23.000. L’aument dai flus migratoris talians al à modalitâts migratoriis diferentis. Di fat, se par tant timp i espatris de Italie pe Belgjiche pal plui a jerin stâts individuâi, dopo de Grande Vuere lis autoritâts talianis e belgjichis a àn cirût di organizâ lis partencis. I datôrs di lavôr belgjics a fasin rivâ, pal plui a traviers de Opera Bonomelli, che e veve sedis a Bruxelles e a Milan, i modui di ingai ai uficis talians pe emigrazion. Ancje l’Ufici Provinciâl dal Lavôr di Udin, nassût tal 1908, al fâs une campagne ative pal colocament di lavoranzie tal forest. Tal 1923, pe publicazion dal opuscul su la ativitât fate dal 1922 al 1923 fin ae sopression dal Ufici (ai 30 di Jugn dal 1923), l’Ufici Provinciâl dal Lavôr al segnale che “il marcjât di lavôr favorît, al è stât par dut l’an [1922] chel de France e in seconde posizion chel de Belgjiche.

fai clic per leggere tutto il documento

i nons

cui ce cuant indulà

Conte une storie di emigrazion
Scrîf culì la tô storie o chê di un parint, di un amì, di une persone che tu cognossis. Tu puedis zontâ fotografiis, altris documents, files multimediâi, leile tal AMMER e fasile cognossi insieme cun altris.