E ven metude in grande evidence la afinitât linguistiche e culturâl, pal fat che la vicinance etniche e varès di incoragjî i potenziâi emigrants talians. La garanzie plui grande che il Canadà al pues dâ rispiet ae Americe Latine e je chê dal viaç, une vore plui curt (10 o 12 dîs invezit dai 25 o 30 che a coventin par lâ in Brasîl o in Argjentine); cun di plui, a podaressin jessi altris fatôrs determinants te sielte de mete de emigrazion. Tal librut di Bossange, Parîs e Le Havre a son i doi ponts di racuelte dai emigrants talians. Si partìs di Parîs, de gare St. Lazare, aes 10.50 de sere dal miercus e si rive a Le Havre aes 6 de matine. Philippe Winterter, locandîr in rue de Percanville n. 20, al va a cjoli i emigrsnts che a rivin cul tren, ju puarte tal so albierc e dopo tal Ufici dal Guvier canadês, tal numar 51 dal Quai d’Orleans. Culì, l’agjent dal guvier canadês al viste i contrats e al imbarcje i bagais. Vinars si imbarcjisi a Le Havre par Liverpool, dulà che si rive domenie, e un dîs zornadis dopo, infin, si rive in Canadà.
Dut câs, tai ultins decenis dal Votcent, i furlans che a van in Canadà a son une vore pôcs. Tai trê agns che a van dal 1876 al 1878, i scancelâts pe “gnove France” segnalâts des autoritâts talianis (che a cjapin dentri emigrants pal Canadà e pai Stâts Unîts) a son dome cutuardis, tal (cuasi) cuart di secul che al va dal 1879 al 1902 trente e un. Un an prime, in ocasion de visite a Udin dal consul gjenerâl di Italie in Canadà, il furlan Giuseppe Solimbergo, il cuotidian “La Patria del Friuli” al ripuarte cualchi osservazion dal consul su lis carateristichis e su la consistence de comunitât taliane tal paîs de Americhe dal Nord: “I nestris emigrants a son pal plui puars; a Montreal la colonie taliane stabile e je di plui o mancul 2000 personis; a Toronto a ‘nd è sui 600; cualchi centenâr a Ottawa, mancul a Quebec. Dopo, a son grups mancul impuartants sparniçâts te provincie dal Ontario, a Winnipeg, tal Manitoba; e plui numerôs te Colombie inglese e soredut te isule di Vancouver, dulà che a son segnalâts, forsit par erôr, 8.000, ma al è sigûr che cualchi miâr a ‘nd è. Al è però impussibil determinâ in maniere precise il numar complessîf” .
Tai prins mês dal 1901, une lungje serie di articui vignûts fûr tai cuotidians furlans “Giornale di Udine” e “La Patria del Friuli” a disconsein chei che a podevin jessi interessâts a trasferîsi tal paîs de Americhe dal Nord informantju su lis “consecuencis seriis” causadis de emigrazion in Canadà . Il “Giornale di Udine” al riferìs i prins risultâts di une indagjin inviade tal mês di Fevrâr dal 1901 dal “Corriere della Sera” su une emigrazion cetant numerose e misteriose viers la frontiere svuizare. I emigrants, scuasi ducj oms, a jerin concentrâts a Chiasso di dulà che dopo a partivin pal Nord. A Chiasso, per cont dai agjents di une societât misteriose, a firmavin un contrat par lavôrs di fâ in Canadà, dulà che si diseve che e fos direte chê grande maree di emigrants [cirche 2.500].