|
indietro
La emigrazion furlane in Austrie e in Gjermanie
Matteo Ermacora
Tra Vot e Nûfcent Austrie e Gjermanie a son lis metis par ecelence de emigrazion furlane. Dut câs, cheste emigrazion e cjapave formis, dimensions e caratars diviers di chei de mobilitât tipiche de ete moderne; di fat, lis primis testemoneancis dal fenomen de emigrazion «tradizionâl» a son dai secui XVI-XVII cuant che cjaristiis, epidemiis e oblics feudâi a vevin obleât i cjargnei a lâ tal Imperi asburgjic, in Istrie e in Baviere. A jerin migrazions temporaniis di cramârs e di tiessidôrs; chest gjenar di mobilitât, che si verificave vie pal Invier, al integrave i redits scjars des ativitâts agriculis tes areis di mont. Lis carateristichis di chescj flus a son restadis simpri compagnis fin ae fin dal Sietcent, cuant che la decjadence de industrie tessile in cjase, lis limitazions aes ativitâts comerciâls, il svilup dai cantîrs edîi di là des Alps insiemi cul aument demografic a àn trasformât in maniere profonde la mobilitât de zone alpine.
Tor de metât dal Votcent, i procès di industrializazion a àn rivoluzionât in maniere profonde l’ecuilibri des zonis montanis dal moment che il svilup des citâts, de viabilitât e des feroviis europeanis vie pe biele stagjon al clamave ducj i oms in etât di lavôr; tra il 1850 e il 1860, te zone montane si verificave une vere transizion, economiche e professionâl, dai mistîrs fondâts sul cumierç ambulant e tessil a chei de edilizie . Dut câs, cheste impuartante «cesure» no je sucedude intune sole maniere: diviers câs studiâts a àn mostrât che za te prime metât dal Votcent i furlans de pedemontane si movevin cuntune cierte sigurece tal cjamp de edilizie a Salisburc, Graz, Innsbruck, Viene e in Baviere; e jere une fase di cambiament, dulà che i mistîrs «vieris» de mobilitât de ete moderne (tiessidôrs, formadeârs, salsamentârs, cramârs) a continuavin a esisti insiemi cu lis professions «gnovis» (muredôrs, marangons, ma ancje fornasîrs).
E propit paîs tant che la Austrie e la Gjermanie, che a cognossevin procès svelts di industrializazion, a àn fat partî gnûfs flus di lavoranzie e a àn dìat plui viamence ae trasformazion de emigrazion furlane; lis diferencis rispiet aes migrazions tradizionâls no tocjin dome lis professionalitâts, ma ancje i timps de emigrazion - che e interessave la biele stagjon, de Primevere al Autun - e la puartade dai flus. Di fat, escludûts dal lavôr tal setôr industriâl, prerogative dai lavoradôrs austriacs e todescs, tor de metât dal Votcent i furlans si son specializâts no dome tai lavôrs plui pesants (manoâi, teracîrs, gjavadôrs, boscadôrs) ma ancje ta chei di abilitât tecniche (muredôrs, pichepiere, segantins, decoradôrs). Vuidâts di capuçats esperts, no cence contrascj, si son fats strade in gracie de mobilitât, de grande produtivitât, de organizazion e des competencis professionâls. Sburtâts dal fogôr di costruî che al jere in Europe, ma ancje de cressite demografiche e de pression fiscâl dal gnûf stât talian, tes ultimis desenis di agns dal Votcent il fenomen migratori si è slargjât des areis di mont ae planure, cjapant dentri bracents, piçui proprietaris che si inserivin tant che operaris cualificâts tai flus direts tes fornâs dai Imperis centrâi. Di fatôr integratîf che al jere te ete moderne, il sisteme migratori stagjonâl al è deventât un element impuartant de economie furlane.
ermacoraGermania_fri
|
|
 i nons cui ce cuant indulà
|
Conte une storie di emigrazion
Scrîf culì la tô storie o chê di un parint, di un amì, di une persone che tu cognossis. Tu puedis zontâ fotografiis, altris documents, files multimediâi, leile tal AMMER e fasile cognossi insieme cun altris.
|
|
web
administrator