ammer - archivio multimediale della memoria dell'emigrazione regionale

indietro

La emigrazion furlane in France 1820-1970

1820-1914 - Mosaiciscj, teraçîrs e muredôrs in France.
Matteo Ermacora

I prins a rivâ te republiche transalpine tai prins agns dal Votcent, a son stâts grups piçui di mosaiciscj e teracîrs dal Friûl ocidentâl che cun procediments inovatîfs a àn restaurât mosaics antîcs de ete romane e decorât palaçs publics e privâts. La espansion urbanistiche de fin dal secul e à clamât dongje ancje muredôrs e pichepiere de zone montane e pedemontane; in dut câs, i flus migratoris viers la France a jerin cetant mancul impuartants a pet di chei viers i Imperis Centrâi.

Lis origjins. Une mete pussibile, ma secondarie
Fin dopo de prime vuere, pai lavoradôrs furlans la France e je stade une destinazion periferiche rispiet ai obietîfs migratoris dai Imperis Centrâi. Daûr des statistichis uficiâls, tra il 1876 e il 1915 a son emigrâts in France in dut 19.713 personis, un numar piçul (che al corispuint al 2.2%) rispiet a chel dai flus pes «gjermaniis» . Fin dal inizi, la emigrazion in chest paîs si è limitade a piçui grups di operaris teraçîrs e mosaiciscj dal Friûl ocidentâl che, dopo vê lavorât in Lombardie e in Piemont, a son lâts in France par fâ oparis decorativis in palaçs publics e privâts. Cuant che tor de metât dal Votcent a son stâts cjatâts mosaics di ete romane, a Montepellier, Béziers e Nîmes a son rivâts lavoradôrs di Secuals pes operazions di restaur. La presince dai specialiscj e je deventade simpli plui fisse: lis inchiestis ministeriâls dai agns 1884-1885 e 1888 a segnalavin la presince di savalonârs e fornasârs di Fane, di operaris stradâi di Davian, di mosaiciscj, pichepiere e savalonârs di Secuals, di scarpelins di Travês. La maestrie di chescj operaris e jere ricognossude e preseade e in chest periodi cualchi scuadre e à scomençât a lâ in Gjermanie, in Olande, in Danimarcje e tai Stâts Unîts .
Cence dubi, la dinamicitât de industrie musive furlane in France te seconde metât dal Votcent e je leade al sucès imprenditoriâl di Gian Domenico Facchina. Nassût a Secuals tal 1826 e formât tra Triest e Vignesie, tor la metât dal secul Facchina al è lât a stâ a Montpellier dulà che al à restaurât paviments antîcs sperimentant un procediment inovatîf che al permeteve di sbassâ une vore i coscj di produzion e di fâ i lavôrs in timps plui curts, podint cjapâ plui comessis. La capacitât doprâ intune tecnichis e tradizions artistichis romanis, venezianis e bizantinis i à permetût di lavorâ te capitâl francese dulà che, dopo di vê partecipât ae esposizion universâl dal 1867, al à decorât il teatri de Opera. Fin tal 1904, cuant che al mûr, Facchina al à viodût dai siei laboratoris di Vignesie e di Parîs, deventant un dai motôrs de emigrazion di mosaiciscj e teracîrs in France: tancj di chescj - come i fradis Odorico - dopo un timp di garzonât, a àn creât ditis autonomis e a àn lavorât in altris citâts francesis . Tal ultin deceni dal Votcent, la espansion dal setôr des decorazions musivis e à fat nassi tantis ditis familiârs e e à slargjât il cjamp di specializazion origjinari, interessant i distrets di Pordenon, Sacîl e Spilimberc .
I flus stagjonâi di teracîrs, mosaiciscj e decoradôrs a son cressûts vie pai prins dîs agns dal Nûfcent, come che e regjistre la inchieste dal Ispetôr dal Lavôr Guido Picotti tal 1909; in dut câs, cul gnûf secul ai specialiscj si son zontadis scuadris di muredôrs e di scarpelins des monts dal Friûl ocidentâl e de Cjargne. Di fat, i pichepiere di For Disot a son partîts tai agns 1898-1899 pes minieris de Lorene e par Parîs, dulà che a àn fat lis stazions de metropolitane . Lis relazions dai plevans de Diocesi di Udin dai agns che a van dal 1911 al 1914 a confermin che la emigrazion pe France e veve zaromai cjapât dentri ancje i lavoradôrs edîi de pedemontane (Vençon, Piluver, Montenârs, Dalès) e de Cjargne (Verzegnis-Cjaicis, Lauc, Dimpeç, Raviei, Enemonç) . Dongje dai mistîrs «classics», tal 1911 il plevan di Dimpeç al segnalave la migrazion di sartôrs par Marsilie e Parîs ; invezit grups di fornasârs di Dartigne e di Buie e dal Friûl di mieç a levin in Alsazie-Lorene, movintsi dilunc de linie di confin contindude tra France e Gjermanie.
Tra Vot e Nûfcent la France e deventave une des metis pussibilis de emigrazion furlane, ma e restave soredut une zone di passaç par chei che, rivâts tai puarts francês, a partivin pal Canadà. Ancje se filtrâts de stampe o des vôs dai pôcs operaris che a levin, i rivocs di ce che al sucedeve in France a rivavin fin in Friûl, al baste pensâ ae cressite dal moviment sindacâl francês, ai episodis xenofobis cuintri i operaris talians a Aigues Mortes tal 1893, o al câs dal sfrutament dai piçui vedreârs.

fai clic per leggere tutto il documento

i nons

cui ce cuant indulà

Conte une storie di emigrazion
Scrîf culì la tô storie o chê di un parint, di un amì, di une persone che tu cognossis. Tu puedis zontâ fotografiis, altris documents, files multimediâi, leile tal AMMER e fasile cognossi insieme cun altris.