ammer - archivio multimediale della memoria dell'emigrazione regionale

indietro

La emigrazion dal Friûl - Vignesie Julie tai Stâts Unîts

Javier Grossutti

Prime dai agns Novante dal Votcent, i europeans che a rivavin tai Stâts Unîts a jerin pal plui britanics, irlandês, todescs e scandinâfs. Ogni grup al à carateristichis lavorativis diferentis e al à une posizion diferente te jerarchie lavorative rispiet a chei de vecje emigrazion. Britanics e todescs pal solit a fasin i mistîrs plui cualificâts e a tindin a vê mansions simpri plui specializadis tal setôr industriâl. Irlandês e scandinâfs, invezit, a son pal plui operaris gjenerics e no cualificâts. Tor dai prins agns Otante dal Votcent, lis areis di partence de emigrazion europeane si movin a Est e a Sud. Chescj flus migratoris gnûfs a son formâts pe plui part di slâfs, ebreus e talians.

Tal 1900, i emigrants che a vignivin dal Ream Unît a jerin dome il 2,8 % di dut il flus european; invezit chei che a partivin de Irlande, de Gjermanie e dai paîs scandinâfs a jerin il 8 %, il 4,1 % e il 7 %. Tai stes agns talians, austroongjarês e ebreus rus e polacs a rivavin al 22,3 %, al 25,6 % e al 20,2 %.
Dut câs, tai agns Otante lis carateristichis principâls de emigrazion taliane pai Stâts Unîts a son za claris. La plui part dai emigrants talians che a rivin tai puarts americans a son de Italie meridionâl, a fasin tancj mistîrs, pal plui no cualificâts, dopo une o plui stagjons di lavôr tai Stâts Unîts a tornin tal lôr paîs di origjin e a rivin in Americhe a traviers dal mecanisim dal “padrone system”. I parons, che a impuartin lavoranzie che e coste pôc, a cognossin l’inglês e lis cundizions di lavôr e cussì a controlin la ufierte di lavôr dai lôr paisans tal setôr des costruzions e des feroviis.
Tai ultins vincjecinc agns dal secul XIX tai Stâts Unîts a rivin cirche 800.000 talians. Tai prins cuindis agns dal Nûfcent la emigrazion taliane pai Stâts Unîts e rive a cifris une vore altis: in plui di trê milions a jentrin tal paîs. Lis regjons che a àn contribuît di plui al flus a son chês de Italie meridionâl: Campanie, Calabrie, Basilicade, Abruç, Molîs e Sicilie in particolâr. Ancje cualchi aree dal Apenin toscan e de Italie setentrionâl, soredut dal Piemont, de Lombardie, dal Venit e plui di dut dal Friûl a son interessadis dal fenomen. Tal 1902, la Industrial Commission, une comission di inchieste creade dal Congrès dai Stâts Unîts par “investigate questions pertaining to immigration, to labor, to agriculture, to manufacturing, and to business, and to report to the Congress and to suggest such legislation as it may deem best upon these subjects”, e cjape dentri Udin e il Friûl tant che “ponts di racuelte” (collecting points) e “distrets di partence” (contributing districts) de emigrazion taliane pai Stâts Unîts. Il percors dai emigrants furlans e venits, cjadovrins e trevisans in particolâr, ju puarte di Udin a New York passant pes stazions feroviariis di Milan, Chiasso, Basilee, Parîs e pai puarts francês di Le Havre e Cherbourg. Tai stes agns, i furlans che a van in Canadà a fasin la stes strade .

grossuttiUSA_fri

i nons

cui ce cuant indulà

Conte une storie di emigrazion
Scrîf culì la tô storie o chê di un parint, di un amì, di une persone che tu cognossis. Tu puedis zontâ fotografiis, altris documents, files multimediâi, leile tal AMMER e fasile cognossi insieme cun altris.