La storie di Walter Mazzoni
L'alt uficiâl di origjin triestine al à incarghis impuartantis da cjâf de Royal Australian Air Force
|
Une Triestine in Australie
Il libri di Ondina Demarchi al à vinçût i premis "Città di Salò" e "Altamarea"
|
|
indietro
LA EMIGRAZION IN AUSTRALIE DAL FRIÛL - VIGNESIE JULIE
Francesco Fait
La direzion migratorie de Italie pe Australie e je caraterizade di un inviament a pene percetibil, ae fin dal Votcent, che i ven daûr un flus pôc rilevant tes desenis di agns dopo che però, dopo de seconde vuere, al cambie a colp e si trasforme intun fenomen tant impuartant, ancje se no propit massîf.
Ve la fotografie de presince di talians in Australie fate in moments diviers: pôc mancul di cuatri mil tal 1891; pôc plui di vot mil tal 1921; vincjesîs mil e sietcent tal 1933. A chescj numars, che a dan cont di une tindince in cressi ancje pal pês, tai prins agns Trente, dai riflès de politiche migratorie dai Stâts Unîts di Americhe rivade al nivel plui alt cul mecanisim des cuotis, ma che a son in ogni câs, in tiermins di valôrs assolûts, avonde piçui, i fâs di cuintri il dât rilevât dal censiment dal 1981, che al permet di definî la comunitât taliane in 603.241 personis, che a son il 4,1 % de popolazion Australiane, e 282.784 di chei nassûts in Italie e plui o mancul 258.733 di seconde gjenerazion e 61.724 di tierce gjenerazion.
Une cressite cussì fuarte de presince taliane in Australie e je l'efiet de emigrazion fisse che e je stade tacant dopo dal secont conflit mondiâl e che i à permetût ae popolazion Australiane nassude in Italie, che tal 1947 e jere di trentetrê mil sîscent personis, di cressi fintremai aes cent e vincj mil tal 1954 e dusinte vincjevot mil unitâts tal 1961. La cressite de corint migratorie e salte fûr di une cumbinazion di dibisugnis complementârs: di une bande chês de Australie, che dopo dal cambi te politiche migratorie sucedût tal 1947 (che al derogave in part de White Australian Policy, par tradizion contrarie ae imigrazion no angloceltiche, dispès ancje in maniere persecutorie) e à viert lis frontieris a lavoradôrs di ducj i paîs europeans; di chel altri lis dibisugnis de Italie, che par srarî i trops dai disocupâts ancje par sbassâ il pericul di tensions sociâls masse altis, pardabon e à viert puartis e barcons a cui che al acetave di lâ vie dal Paîs. Il risultât di cheste concuardie in materie di moviment internazionâl di lavoranzie al è stât un acuardi di emigrazion assistude, firmât ai 29 di Març dal 1951, che al à permetût e judât la emigrazion di plui o mancul cuarantecuatri mil talians fintremai al 1964, an che al à finît di funzionâ. Ma si à di dî che la emigrazion assistude e je stade dome une part dal plui grant moviment migratori de Italie pe Australie, che i si à di zontâ la emigrazion libare, o spontanie, o privade, che in chel istès timp e à puartât in Australie plui o mancul dusinte otante mil talians.
Il moviment migratori dal Friûl - Vignesie Julie si sconfont tal fenomen talian fintremai a dopo de seconde vuere mondiâl cuant che, daûr des vicendis e des modificazions teritoriâls dal confin orientâl, al cjape une fisionomie sô, che e e je particolâr a pet dal rest di Italie, ma ancje diferenziade tes sôs stessis componentis. Diferenziade fin tal pont che nol somee esagjerât doprâ il numar plurâl e fevelâ di emigrazions dal Friûl - Vignesie Julie pe Australie dopo de seconde vuere, distinguint trê tipologjiis: chê dai istrians e dalmatis; chê dai triestins (e, di mancul, dai gurizans); chê dai furlans.
Chest contribût si disglagnarà tes pagjinis che a vegnin provant di dâ reson di cheste complessitât. Dopo di un tacâ li che si mostrarà lis usmis lassadis di furlans e di triestins, istrians e dalmatis, (5) des origjins de emigrazion taliane in Australie fintremai al secont conflit mondiâl, si provarà di cualificâ e di cuantificâ chês che a son stadis definidis lis emigrazions dal Friûl - Vignesie Julie in Oceanie, cirint ancje di dâ reson des classis di motivazions che in ognidune di chestis a àn vût il lôr pês e il lôr sburt tal emigrâ.
Su la fase de esperience migratorie dopo de sielte di lâ e de partence, vâl a dî l’impat e la sistemazion tal paîs di destinazion, si cirarà di mostrâ in forme sintetiche i moments iniziâi de storie dai furlans, dai triestins, dai istrians e dai dalmatis, doprant modei o paradigmis di interpretazion gjavâts des testemoneancis dai protagoniscj stes. Ae fin si sierarà cun ciertis osservazions su lis dinamichis migratoriis dai agns Sessante a vuê, cun cualchi coment su chei che a son tornâts, sedi prime che dopo dal fenomen cognossût tant che inversion dal salt migratori, che tal Friûl - Vignesie Julie al è dal 1967, in anticip a pet de medie taliane.
fai clic per leggere tutto il documento
|
|
 i nons cui ce cuant indulà
|
Conte une storie di emigrazion
Scrîf culì la tô storie o chê di un parint, di un amì, di une persone che tu cognossis. Tu puedis zontâ fotografiis, altris documents, files multimediâi, leile tal AMMER e fasile cognossi insieme cun altris.
|
|
web
administrator