O ripuartìn l’articul di Romeo Varagnolo publicât tal gjornâl "La Fiamma"

La cariere dal Comandant Walter Mazzoni fin da cjâf de Royal Australian Air
Il Wing Commander Walter Mazzoni, de Royal Australian Air Force tal 2007 al à fat 32 agns di servizi atîf.
È je stade une cariere militâr intense, onorade, otignude dopo agns di studi, esams di alt nivel tecnic operatîf e cors continuâts di specializazion e adestrament intai diviers aspiets de aeronautiche militâr australiane.
Pal comandant Mazzoni e je stade una lungje strade par rivâ insom di une cariere che il mês di Otubar dal 2005 lu à viodût a cjapâ il comant de plui grande e impuartante base aeree militâr de Australie a Williamtown, tal stât dal New South Wales, dongje de citât di Newcastle.
«Stant che e je une base aeree di combatiment…», al conte il comandant Mazzoni, «il personâl militâr al à programs precîs e prioritaris pal adestrament e pal inzornament tes diferentis specializzazions de aeronautiche militâr. Duncje, il personâl tecnic di une moderne base aeree di combatiment al à di jessi pront par une azion imediade di difese e di riscuintri cun mieçs di alte tecnologjie militâr».
Nassût a Perth tal 1955, di gjenitôrs triestins, Silverio e Maria, Walter Paolo Mazzoni al mostre za di piçul di vê un grant interès pe aeronautiche.
Al cognòs ducj i avions di linie, il lôr valôr di puartade, il numar di spassizîrs, civîi e militârs che al cjatave des rivistis e dai gjornâi.
Pai gjenitôrs a jerin curiositâts tipichis dai fruts, ma par Walter al jere il prin pas intune cariere straordenarie te aeronautiche militâr.
Walter al scomence i studis elementâris in Australie, ma tra il 1965 e il 1966 al à la oportunitât di frecuentâ la Scuele Internazionâl di Triest in ocasion di une lungje permanence dai gjenitôrs te lôr citât di origjin, dulà che ducj a fevelin "la lenghe di une volte", il triestin, che ancjemò a vuê Mazzoni al dopre cui siei gjenitôrs e cui amîs di date viere.
Tornât in Australie cu la famee, al fâs la maturitât tal 1973 li dal Holy Cross College di Ryde (Sydney) e al cjate lavôr intune dite di architets di Sydney, la Kerr-Smith-Malone.
Ma il zovin, ancje se sul lavôr al jere stimât, al capìs che chê no jere la sô vere vocazion e tal 1975 al decît cu la benedizion rassegnade dai gjenitôrs, di jentrâ te aviazion militâr australiane, la RAAF, e fin dal inizi si bute a plen tai studis. Al veve di recuperâ il timp pierdût e dopo cors intens, esams pratics, provis, manovris, dissipline di fier, il so grup al è stât sielzût par une mission tal forest de RAAF.
Un "Tratât di Sostegn Vicendevul Internazionâl" che al cjapave dentri la Australie, la Gnove Zelande, la Indonesie, la Malesie e la Tailandia.
Il contingjent australian al jere stât mandât in Malesie te base aeree di Butterworth, dongje de isule di Penang, cuntun scuadron di Mirages, avions di combatiment, e al reste in chê base dal 1981 al 1984.
Ae fin de mission, Walter al passe al "Search and Rescue Team" di elicotars militârs, dulà che si met in evidence pe sô capacitât di azion.
La base e je chê di Williamtown (Newcastle) e tal 1986, passâts i esams di amission, al jentre te Academie Militâr de Aeronautiche dulà che, dopo 22 cors di base e cualchidun adizionâl di Control di Trafic Aeri, Direzion, Logjistiche e Sistemis Informatics, al rive insom dai studis cul massim dai vôts.
Ai 27 di Novembar dal 1987, te place des armis de Academie Point Cook dal Stât dal Victoria, denant di doi gjenitôrs braurôs e des autoritâts plui altis de Aeronautiche Militâr Australiane, Walter Paolo Mazzoni, al alce i voi viers il cîl scjavaçât dai avions di combatiment in onôr dai gnûfs uficiâi e al corone il so sium.
Ma il timp al passe e di chel moment la cariere militâr di Walter Mazzoni e va ancjemò indevant.
1 Cu la incarghe di Uficiâl di Colocament, Mazzoni al va in mission tai Stâts Unîts, par studiâ progjets logjistics specifics, insiemi cu la United States Air Force e il Dipartiment di Difese.
2 Dopo, tant che Ufficiâl de Royal Australian Air Force, al cjape la responsabilitât dal Contingjent Australian a Nairobi, in Kenia, dulà che al dirêç, simpri in strete colaborazion cu la organizazion di assistence de Nazions Unidis, une rêt di colegament e di moviment dai fis traspuarts aereis.
Prime di dut al jere responsabil tal coordenâ i grancj volums di caric e di traspuart di passezîrs e tal mantignî i rapuarts di sigurece e di cooperazion cu lis diviersis organizazions forestis di assistence, cu lis ambassadis des svariadis nazions e ancje cun chê australiane.
3. Plui indenant, al è deventât diretôr responsabil pal moviment dai avions di traspuart e pe assistence di dutis lis zonis de Somalie e al cjape la incarghe di consulent pe direzion di aministrazion dal contingjent des Nazions Unidis e dal personâl civîl, par problemis logjistics di moviment aeri, Somalie, Kenia e altris destinazions, no dome di materiâl ma ancje dal personâl no militâr. Intun paîs savoltât de vuere civîl, cualchi volte il moviment di mangjative, medisinis e int al jere une vore critic e pericolôs.
4. Dopo tantis e diferentis incarghis di responsabilitât puartadis insom in Somalie e in Kenia, tant che Diretôr Logjistic Manager Mazzoni al passe a perfezionâsi tal riforniment e tal control dai avions de RAAF stanziâts no dome in Australie ma ancje fûr.
5. Tant che Diretôr pal Coordenament e pe aministrazion dal moviment aeri e veicolâr di une gruesse base aerie militâr, Mazzoni al mostre la sô capacitât e sigurece di programazion dal plui grant aeropuart militâr de Australie.
6. Ai 5 di Otubar dal 2005, intune cerimonie formâl a Canberra, l’Air Marshall, Chief of Air Force, G.D. Sheperd, AM, al consegne in maniere uficiâl la targhe di "Appointment to Command" al Wing Commander Walter Mazzoni, cu la incarghe di Comandant de Base Aerie Militâr plui impuartante de Australie, a Williamtown, NSW.
Une responsabilitât puartade indenant cun sucès fin al 2007.
7. Une gnove mission, che e tache ai 27 di Dicembar dal 2007, e spiete il Wing Commander Mazzoni tai Stâts Unîts, tal stât dal Nebraska, in rapresentance de Royal Australian Air Force.
Tal Nebraska, insiemi cuntun grup di esperts dal Guvier dai Stâts Unîts e di altris stâts, al cjaparà part ae programazion di strategjiis logjistichis par garantî la prevenzion di ats di terorisim estrem pe sigurece civîl e militâr des infrastruturis aeriis di dut il mont.
I ricognossiments plui impuartants dal Wing Commander Walter Mazzoni a son:
· Australian Active Service Medal
· Australian Defence Force Service Medal
· United Nation Medal (Somalia)
· Royal Australian Air Force Commendation
· Air Force Organizational Excellence Award (U.S.A.F.)
Profîl Personâl:
Walter Mazzoni al è maridât e al à doi fîs, Haydn di 23 agns e Cartia di 18.